Long namba 25 Okis 2023, i lukim Depatmen blong Fisheries i mitim krae blong blong olgeta
fama blong Akuakalja (fidim fis blong wota), taem i luk opening blong wan smol hatchery,
we bambae hemi benefitim olgeta famas long saed blong saplaem olgeta bebe blong fis
blong mekem fam.
Dipatmen blong Fisheries hemi bin stat wok wetem olgeta komiuniti blong Saot Santo, stret
long Sarete stat long yia 2004 long saed blong Akuakalja. Stat long taem ya i lukim olgeta
komuniti blong Sarete oli bin soem plante interes blong famem fish.
Opening blong Mini Hatchery i lukim olgeta fama blong Saot Santo oli glad tumas from
bambae hemi katem cost blong transpot blong olgeta, blong go mo kam long Luganville
from olgeta bebe fis.
Albert Ruddley olsem Sekretri Jenerol blong Sanma Provins hem nao hemi kam blong ofisoli
openem Mini Hatchery wetem Acting Director (AD) blong Vanuatu Fisheries Department
(VFD), Sompert Gereva.
Long toktok blong hem, AD blong (VFD) Sompert Gereva hemi talem se hemi no wan
sapraes we VFD i jusum Sarete komiuniti follem bigfala histri we VFD hemi gat wetem
komiuniti long saed blong Aquaculture.
“Team we saeklon Pam i hitim Vanuatu, fes meat we i stap long sospen blong olgeta man
Santo hemi freshwater fis. Ino tin fish or chicken be hemi fish,” AD Gereva i talem aot long
fored blong full komiuniti blong Sarete, Wailapa mo Nakere.
“Olsem Sekretri Jenerol blong Sanma Provins mi wantem luk provins i yusum fasiliti blong
bildim ap wan strong mo helti komiuniti thru long ‘protein’ we olgeta fish bambae oli
provaedem.
“Sapos wan kategori 5 saeklon i straek bageken mi save finis se bambae yufala i save feedim
full Luganville wetem fish we bambae i kamaot long ples ya,” Sanma Sekretri Jenerol
Ruddley i talem.’
“Mi tekem taem ya blong talem tankio long Vanuatu Gavman we hemi fundem Mini
Hatchery ya mo VFD we hemi bin provaedem teknikol asistens blong mekem se projek ia i
luk laet tede.”
Mini Hatchery bambae hemi save provaedem 500,000 to 1,000,000 bebe blong fish long
olgeta fama raon long Saot Santo mo Sanma eria, long wan yia.
Long 2022 i bin gat ova 400 fama, mo oli bin harvestem ova 5000 kilograms blong fish we i
bin salemaot nomo long olgeta komiuniti long Saot Santo.
‘Standard saes blong fish pond we hemi semi commercial’ saes blong 20x10m fish pond oli
bin trialem aot long Sarete komiuniti mo faenem aot se saes ia hemi wok blong fam long
wan bikfala scale blong fam, mo tede Vanuatu Fisheries Department (VFD) i yusum olsem
wan long olgeta standad saes pond blong hem.
Mini Hatchery ya KEP and Earth Moving Construction i bildim, mo Vanuatu Gavman nao
hemi fundem blong helpem program blong Akuakalja long Vanuatu.
